THIS IS WHAT WE CALL 港產片

望住四張神經俠侶買一送一贈券日日囉囉孿，等左兩個禮拜都無人放聲氣話睇。終於等到eason迷要我陪佢，即刻言若有憾，心實喜之。 利舞台自從無左個台之後都未去過，入場見無斜度座位打左個突，睇埋個嘔到一地血0既小喇星trailer直情反哂眼想訓陣先。點知佢唔聲唔聲就出片頭，一見背景個手繪灣仔街景即招回三魂七魄。一邊覺得筆風非常眼熟一邊諗畫師是誰，並駭然發現爾冬昇監製，阮世生導演，唔知頭唔知路齋貪便宜0既我好鬼驚喜，心裡暗忤：「唔怪得有陣UFO味啦」。 神經俠侶係一個發生0係香港，講香港話，寫香港人0既故事。 響一個社區拍完一套戲，唔記得有無人做過。借兩隻pc仔帶大家遊灣仔。除左片頭0既手繪街景，穿插其中0既型爆舊樓、金紫荊、入境處天橋、電車路、喜帖舖、配匙舖、買錯胸圍帶錯BRA、灣仔碼頭等。刻意得來比彭浩翔少一份扮野，令人想起當年《風塵三俠》、《新難兄難弟》0個份親切。 好耐無睇過一套講咁多香港話0既戲。精選對白包括「彈下彈下就無得彈」；「求求其其等收皮」及對雨中0既麻甩佬同未成年少女講「記得著雨褸」、「小心比雷劈」。職業病發我第一時間係諗「點譯呀大佬」，跟手就0黎過會心微笑。哦地唔係淨係識趕懶音架。 用93分鐘講香港人密集到好似人文大觀:灣仔餵貓人；有錢半山人；隨口0翕出七個手機型號0既一般市民；來香港搏殺0既大陸人；九十年代頭都仲好常見比大耳窿迫到痴線跳樓0既小市民；TWIN屎；紙皮婆婆；十二點後話哂事大佬細佬；當然仲有不經不覺滑哂啞發夢有個未成年少女0黎重燃生命熱情0既你你我我。 最後0黎個港產大團圓:癲佬搵到有情人(唔知點解諗起三個相愛的少年個結局)；方中信請容祖兒坐車尾(係呀，總好過話佢同阿臣搞埋...)；陳奕迅見board升職。好單純，好predictable。未有爛尾之感因為完場30秒導演帶你番來現實，遙遙呼應片頭自已打沉自己「幻乜鬼想丫」0既頹氣，點出香港人骨子裡最可取0既實實際際。 嗌哂救命話好睇當然因為有強勁港產卡士!惠英紅0既爐火順青令人心跳；吳鎮宇係　精　采；eason除左個肚腩以外仲有發展空間；benz雄&林雪&錢嘉樂係緊守崗位；方中信竟然搣甩師奶影子做番性感尤物；智叔+甘草球證+半夜0居野大叔係對觀眾0既慰藉。咁仲有可以係任何人0既容祖兒同吳日言，港產片係咁架啦，以前都有柏安妮架(但係以前0個個係柏安妮喎...)。 回想每次用贈券睇戲都會嗌回水｜｜回水俾佢。今時今日遇到有香港味0既港產片要我比$65我都願。諗起阿興寫新不如舊，又早幾日beyond話有老本怕咩食。超同意丫，如果姊妹情深、風塵三俠好睇，怕咩行舊路？點解唔係胡鬧就係警匪片？點解要學死鬼佬講slang仲要懶投入咁喎？Roll字幕送賀年片NG鏡頭，阿叔無開燈，全場無人起身，睇到「全片完」三隻字先至魚貫離場，一邊口0翕0翕話「估唔到喎...幾好睇呀呵...」。今晚我先記得，其實我好鍾意睇港產片架！ 備註: 1. 片中硬插一段吳鎮宇同新人張萌0既激吻場口，查抓之下發覺老哥早就發爛（見內文）。係好夾硬，無泥啦肺，但係身為少女影迷0既我完全被老哥雙臂彎(我知宜家無臂彎我out syl好未)引左去。前排比隻小白龍嚇親，差0的唔記得佢陣爆裂男人味，哎喲。(少女影迷報告完畢) 2. 想搵UFO資料，原來係...無0既。最叻都係搵到陳可辛。搵鬼佬戲by actor又得by director又得by company又得。香港無架喎。 3. 其他 - 石琪@明報 - 163.com - 王進@香港影庫 -神經俠侶.灣仔.龍應台 4. 神經俠侶製作特輯 5. 容祖兒0既角色4478，正係一個纏繞我一生0既數子，唔知係咪咁講覺得更好睇呢？(無聊註解)