人人來寫100條

1. 極度憤怒時會哩埋(或大街大巷)哭鬧 2. 二十有四快五 3. 好最近開始覺得照鏡唔難受 4. 上年鍾意影相買左部傻瓜DC, 仲拎部古董canon去整左幾舊水 5. 點知啪一聲唔鍾意左, 宜家拎哂0的錢買冷同冷針 6. 鍾意埋哂0的人係唔同時區 7. 有近視十幾年, 帶上眼鏡前一日同阿媽攬住喊因為覺得自己係殘障 8. 獨女 9. 無兄弟姊妹於是周街搵左堆番來 10. 有能力將身邊所有男性變成屋企人 11. 鍾意針對最鍚自己0既人 12. 鍾意打/鬧對自己好0既人 13. 寫信俾人如果佢唔覆會寫多幾封俾佢 14. 一覆即唔理佢 15. 聽講話有5'5, 但係睇來睇去都唔似有 16. 曾經沉迷chatroom, 不眠不食體重暴跌10磅 17. 瘦左之後買左條好靚0既牛仔褲去歐洲不過宜家著唔落 18. 「基乎」可以包容女人所有衰0野 19. 對男人一丁屎耐性都無 20. 唔鍾意我老豆, 不過俾面佢係我阿媽愛同愛我阿媽0既男人 21. 第二至愛阿媽, 以前覺得佢一死我必定要跟埋去 22. 撈過TA, 教英文, 勁愛0的學生 23. 宜家都仲好愛0架, 時時保持聯絡 24. 教過書之後更加唔敢生仔 25. 從來無想過要結婚, 雖然阿婆講過一世人一定要試一次, 明知唔0岩都要試(好似食大閘蟹咁) 26. 15-20歲幾乎每個生日都係surprise party 27. 0個時覺得如果無人記得我生日我即係死左 28. 由細到大番工番學路程都唔會超過半粒鐘 29. 第一至愛係自己自己自己 30. 睇亦舒大 31. 不過其實唔鍾意睇書 32. 曾經好迷電影, 近年放軟哂手腳 33. 由小五到中五寫過三大本日記 34. 睇過一本岑海倫叫《幸運指環》笑到喊 35. 成日吸引到細心靚女照顧 36. 不過好多時佢地turn out係巫婆 37. 好鬼鍾意扮野 38. 以前(12-23歲)塊面似鞋抽, 成日幻想唔駛整容自動變靚, 點知上年真係無啦啦變左 39. 從未真正為體重/體型煩惱 40. 張張刀無張利, 鈍刀包括書法、羽毛球、游水、影相、寫野、讀書 41. 當年教練叫我考銀禧, 阿媽話:佢玩下之嘛, 駛乜咁認真喎? 42. 又當年跟關麗珊「學」寫野, 上唔夠兩堂就嫌人呢樣0個樣唔去上(可能就係咁做唔成作家) 43. 成日俾人當細路, 雖然我堅持「我已經成熟左好多」 44. 把口會唔受控制自己發聲 45. 每年做一次精神年齡測試, 上年終於到21 46. 每日飲至少一杯咖啡 47. 家庭第一 48. 相信命運其實係自己0既選擇結果 49. 好想試下放下人性出盡力去打人 50. 每次戲院熄燈都覺得有人會係後面割我喉 51. 可以一個人係尖沙咀, 但唔鍾意一個人響銅鑼灣 52. 以前鍾意夏天, 宜家鍾意秋天 53. 鍾意布拉格多過巴黎 54. 成日有事無事上網check機票價錢 55. 鍾意將email當icq咁用 56. 叫個飯都心大心細好屎忽 57. 把口非常俗 58. 時時都問點解我咁幸福快樂 59. 每次約會都裙拉褲甩碌出門口 60. 每年eliminate好多識0既但係唔知keep in touch0黎做咩0既人 61. 財政狀況長期水深火熱 62. 好窮, 但係老闆話「看不出來哦」 63. scattered-minded, 腦快過口, 講野無sequence一舊舊, 老闆叫我講野唔好咁pulp fiction 64. 丫, 唔記得話你知我有個好老闆, 成日during office hour同我傾電話談天說地 65. 傳說話我雙眼可以驅鬼 66. 我信呢個世界除左人之外仲有好多野唔驚得咁多 67. 少少事就大驚少怪 68. 大件事就賴老定 69. 頂得住縫針無麻醉 70. 但係頂唔住大姨媽每月蹂躪 71. 唔怕蛇蟲鼠蟻 72. 曾經非常接近酗酒 73. 做過好多自覺ok瘋狂0既事 74. 包括飲醉酒開電單車(響大陸) 75. 十幾歲人第一次爬樹然後跌落0黎(咁都唔死執身彩) 76. 深夜時分飲醉酒上左人地架車唔知人地係邊個 77. 「我唔係飲醉酒先做錯事, 不過咁0岩做錯事0個時都係飲左酒。」from酩酊 78. 大學時修德文, ich habe alles vergessen. 79. 成日因為個sales靚/好傾買0的無謂野 80. 一定要聽歌, 幾時都要聽歌 81. 希望有Mr. Right但係唔信 82. 有好多好多人愛(講埋出口0個隻) 83. but I'm nobody's somebody 84. 小五開始籌辦喪禮 85. 一定一定要係cocktail party, 有酒飲有K唱有大抽獎 86. 認同「自由是時空交錯的絕對孤獨」 87. 享受長途車 88. 一唔開心就叫pizza然後食哂 89. 阿姐話我係hopeless romantic, 不過我唔認 90. 做過最proud0既事包括走火入魔式考A-level 91. 同一條友去英國打工然後歐遊 92. 老豆成日話我投胎0個時排錯隊唔覺兒做左女 93. 睇左N次Pretty Woman以前唔敢話比人聽 94. 真係會叫佢做偶像0個個人叫林海峰 95. 細個0個時唔鍾意自己講野咁好笑, 覺得自己係小丑 96. 宜家無咁好笑, 亦無咁多野介懷 97. 以前乜都執著乜都無情講, 近年覺得好多野都無所謂好多野都可以妥協 98. 曾以bedofroses.org及be-m.com之名寫過兩個網, 因收視欠佳, 現轉做全職blogger 99. 年幾前見人寫100已經心郁郁又左度右度唔知度乜q搞到宜家out哂先去做, 對其他潮野亦一樣 100. 寫到廿幾已經無貨, 雖然勁愛自己但係對自己無乜興趣同認識