新年５問

１．點解宜家新年唔似新年？ 舊底大年初一一定要著新底衫褲，新衫新鞋，全家一定要晨咁早起身，洗好面刷好牙同父母拜年，成個正月都要小心把口，唔准講「衰野」包括「死」、「弊」、「大鑊啦」諸如此類，否則即刻掌咀。家下利是唔包，唔買新衫，無糖無開心果，得兩粒瓜子幾舊糕。「係我刻意安排0既。」阿媽話「過年如過日」係佢0既特別安排，「無必要為大家增添無謂壓力丫」。德政呀太后娘娘，德政呀！願娘娘萬歲萬歲萬萬歲。 ２．點解新年多嗌烚？ 幾乎完全無社交生活0既老豆忽然出門，一次過見哂一年或幾年唔見0既成村人，唔知著咩衫可以遮到肚腩，做乜野先唔覺佢光左頭, 難免騰雞。等車又嫌耐懷疑去錯站，上車又嫌迫鬧阿媽晏起身，無帶糖食又吟自己無記性唔夠訓，如果佢有個神高神大0既仔／女(s)係身邊唔嘈交就有鬼啦。 ３．點解怨口怨面？ 人家時時話社會氣氛唔好其實我唔係好知係乜。皆因無論咩時勢我地一家三傻都係嘈嘈閉，矇盛盛咁有日過日。但係尋日見到一眾親戚們就丁一聲明左。姨丈以前唔知撈乜好意氣風發成日鬧老婆蠢又話要個仔第日做乜乜物物，今日由長工轉contract，層樓變負資產，好辛苦捱到個女中四點知個仔先0岩0岩七歲，唔愁就怪；舅父以前同個仔成日埋牙，好彩有個二舅母陣住，野野大事化無。前幾年舅父間廠北移，自己番大陸搞生意，同大部分人一樣一鑊粥。今日見佢已經老到無哂火，個仔又七尺高有型有款，可憐舅母一頭煙燥到上面，連路過阿毛都見到佢面上寫住「我好支力呀，有無人理下我感受！」；客廳氣氛膠到可以切開，唯有匿入廚房扮乖女陪下大姑媽。姑媽：「姑媽對腳好痛。」咁唔好做囉。「弊在ｄ仔女無出色呢。」哇！轉話題！你仲食煙呀？「姑媽放工番黎對住四面牆．．．咪食煙囉．．．」姑媽你好衰架，整喊人0既．．．．．． ４．點解咁叉支力？ 當你發現你睇住佢阿媽拍拖結婚生女再生佢0既細路宜家已經就黎大學畢業，會自然撻皮。 ５．點解新年多舊魚？ 因為唔可以係「新年４問」，所以搭舊魚。新年快樂，野！